| ||||||||||||||||
Министерство информации Республики Беларусь |
||
Мероприятия |
||
У адпаведнасці з Указам Прэзідэнта Рэспублікі Беларусь ад 26 сакавіка 1998 г. № 157 "Аб дзяржаўных святах, святочных днях і памятных датах у Рэспубліцы Беларусь" Дзень беларускага пісьменства штогод адзначаецца ў нашай краіне ў першую нядзелю верасня.
Традыцыйна свята пісьменства праводзіцца ў гістарычных і культурных цэнтрах нашай краіны, з якімі непарыўна звязаны жыццё і дзейнасць славутых дзеячаў Беларусі розных часоў.
Дзень беларускага пісьменства праходзіў у наступных гарадах Беларусі:
1994, 2003 – Полацк
1995, 2004 – Тураў
1996 – Навагрудак
1997 – Нясвіж
1998 – Орша
1999 – Пінск
2000 – Заслау'е
2001 – Мсціслаў
2002 – Мір
2005 – Камянец
2006 – Паставы
2007 – Шклоў
2008 – Барысаў
Селета свята адбудзецца 6 верасня ў г. Смаргоні Гродзенскай вобласці.
Штогадова ў святочных мерапрыемствах Дня беларускага пісьменства прымаюць удзел высокія афіцыйныя асобы Рэспублікі Беларусь, дзеячы літаратуры, культуры, навукі, мастацтва, журналісты, прадстаўнікі пасольстваў, акрэдытаваных у Рэспубліцы Беларусь, замежныя дэлегацыі.
За час свайго існавання Дзень беларускага пісьменства стаў па-сапраўднаму нацыянальным святам, значнай падзеяй культурнага жыцця краіны. Святочныя мерапрыемствы праходзяць не толькі ў горадзе-сталіцы, але і па ўсёй рэспубліцы. Гэта – тэматычныя ўрокі, лекцыі, семінары, творчыя сустрэчы з вучонымі, пісьменнікамі, дзеячамі культуры, педагогамі.
Дзень беларускага пісьменства, у аснову канцэпцыі якога пакладзена ідэя прапаганды здабыткаў айчыннай пісьмовай культуры, пераемнасці духоўных традыцый Беларусі, дае ўнікальную магчымасць сустрэцца з жывым словам, жывымі сведкамі творчага працэсу стварэння кнігі, газеты і часопісы.
Як і заўсёды ў рамках свята адбудзецца навукова-асветніцкая экспедыцыя "Дарога да Святыняў" з благадатным агнём ад Гроба Гасподняга. Яна пачнецца ў Мінску 2 верасня і пройдзе праз святыя мясціны Міншчыны, Брэстчыны, Гомельшчыны і Гродзеншчыны.
5 верасня ў Смаргоні адбудзецца пасяджэнне "круглага стала" "Мастацкі тэкст як сродак зносін народаў" з удзелам замежных пісьменнікаў, а таксама навукова-практычная канферэнцыя "Смаргонскія чытанні". А ў вечары гэтага ж дня ў Летнім амфітэатры, што знаходзіцца ў Гарадскім парку, будзе прадстаўлена канцэртная праграма ансамбля салістаў "Класік-авангард" Белдзяржфілармоніі "Пад гукі даўніх паланэзаў…", складзенная з твораў кампазітараў ХІХ стагоддзя, творчыя лёсы якіх цесна звязаны з беларускай культурай. Гэта Мячыслаў Карловіч, Ян Карловіч, Станіслаў Манюшка, Фларыян Міладоўскі, Міхал Клеафас Агінскі.
6 верасня першай падзеяй святочнага дня стане Божая Літургія ў Саборы Праабражэння Гасподняга.
Галоўнымі месцамі правядзення свята абраныя Цэнтральная гарадская плошча і Летні амфітэатр у Гарадскім парку.
На Цэнтральнай плошчы будзе размешчана галоўная сцэна, дзе адбудзецца ўрачыстая цырымонія адкрыцця Дня беларускага пісьменства, а таксама шматлікія канцэртныя выступленні мастацкіх калектываў Гродзенскай вобласці і Смаргонскага раёна і вячэрні святочны канцэрт. На сцэне Летняга амфітэатра ў Гараскім парку пройдзе цырымонія ўзнагароджання пераможцаў нацыянальнага конкурсу "Мастацтва кнігі" і Рэспубліканскага конкурсу на лепшы твор у галіне паэзіі, прозы, драматургіі, літаратурнай крытыкі, дзіцячай літаратуры.
У Гарадскім парку на працягу дня з 10.00 да 19.00 гадзін пройдзе Фестываль кнігі і прэсы. Тут на імправізаваных пляцоўках разгорнуцца тэматычныя выставы "Шлях да ведаў", "Зямля пад белымі крыламі… Году роднай зямлі прысвячаецца", а таксама "З гісторыі пісьменства і асветніцтва на Беларусі" (экспазіцыя прадпрыемстаў "Саюздрук") і "СМІ Гродзеншчыны". Таксама адбудуцца прэзентацыі перыядычных выданняў, беларускіх выдавецтваў і новых кніг, сустрэчы з пісьменнікамі, паэтамі, выдаўцамі, журналістамі.
На працягу ўсяго дня будуць праходзіць святочныя мерапрыемствы, у прыватнасці: "Свята дзіцячай кнігі і прэсы" (Дзіцячая пляцоўка ля кінатэатра), спартыўная праграма на гарадскім стадыёне, Праваслаўная выстаўка (на пляцоўцы ля сабора), канцэрт духоўнай музыкі (Каталіцкі маладзёжны цэнтр).
Традыцыйна кожнае свята пісьменства пакідае пасля сябе адметныя знакі пашаны і павагі да людзей, якія сваім адданым служэннем Бацькаўшчыне засталіся ў гістарычнай памяці народа. Сёлета такой постаццю абраны славуты беларускі паэт Францішак Багушэвіч, урачыстае адкрыццё помніка якому адбудзецца ў цэнтры горада ля гасцініцы "Смаргонь". На працягу дня будуць таксама арганізаваны экскурсіі у музей-сядзібу Ф.Багушэвіча ў Кушлянах.
Увечары на галоўнай сцэне пройдзе цырымонія ўрачыстага закрыцця свята, перадача эстафеты – сімвалічнага вымпела гораду-сталіцы будучага свята (г.Хойнікі Гомельскай вобласці) і святочны канцэрт з удзелам вядомых мастацкіх калектываў рэспублікі.
