З каханымі не расставайцеся
Самая культурная кнопка айчыннай тэлепрасторы прапануе гледачам праглынуць усе лепшыя савецкія кінахіты адразу. На працягу некалькіх дзён на канале пройдзе марафон самых вядомых стужак вытворчасці «Масфільма», «Беларусьфільма», «Ленфільма» і Адэскай кінастудыі.
У кінастужцы «Гараж» Андрэю МЯГКОВУ дасталася «нямая» роля лабаранта Хвастова — героя, які ўвесь фільм сядзіць з прастуджаным горлам і можа іграць выключна тварам.
Удар, яшчэ ўдар
Раніцай аўторка «Беларусь 3» запрашае паглядзець лепшы музычны фільм 1986 года па версіі часопіса «Советский экран» — гэта, канешне, «Зімні вечар у Гаграх». Музычную драму Карэна Шахназарава пра тое, як да майстра чачоткі ў выкананні акцёра Яўгена Еўсцігнеева звяртаецца герой Аляксандра Панкратава-Чорнага з прапановай навучыць яго стэпу, можна паглядзець у 08:25. Вядома, што, працуючы над роляй, Еўсцігнееў сапраўды браў урокі стэпу (але ж у некаторых эпізодах, тым не менш, замест яго танцаваў Уладзімір Кірсанаў). А прататыпам спявачкі Ірыны Мельнікавай, ролю якой выканала ў фільме Наталля Гундарава, была Ала Пугачова. Менавіта ёй першапачаткова прапаноўвалася роля, аднак спявачка адмовілася.
У гэты ж дзень у 13:55 гледачам выпадзе цудоўная магчымасць зноў сустрэцца з супрацоўнікамі выдуманага інстытута «Ахова жывёл ад навакольнага асяроддзя». Сатырычную камедыю «Гараж» рэжысёра Эльдара Разанава варта паглядзець хаця б дзеля бліскучага акцёрскага складу: Лія Ахеджакава, Андрэй Мягкоў, Ія Савіна, Георгій Буркоў, Святлана Немаляева і Валянцін Гафт, які зусім нядаўна пайшоў ад нас… Дарэчы, першапачаткова ролю старшыні праўлення гаражнага кааператыва Сідорына павінен быў выконваць Аляксандр Шырвінд. Але ў той час ён выпускаў спектакль у Тэатры сатыры, таму не змог прыехаць на «Масфільм». Пачалі аператыўна шукаць замену. Тады Лія Ахеджакава прапанавала Разанаву звярнуць увагу на Валянціна Гафта, які па шчаслівым збегу абставін здымаўся ў гэты ж час у суседнім павільёне.
Дазвольце вамі захапляцца
Серада на «Беларусь 3» таксама пачнецца з кіно. У 08:25 можна будзе паглядзець мастацкі фільм «Вялікі перапынак» — камедыйную меладраму Аляксея Коранева пра вучняў вячэрняй школы. Гэтая стужка зрабіла зоркамі савецкага экрана шмат артыстаў, у тым ліку Міхаіла Конанава, які сыграў галоўнага персанажа. У пробах таксама ўдзельнічаў Канстанцін Райкін, але ж зацвердзілі Конанава, які, дарэчы, ставіўся да ролі вельмі скептычна. У сваіх мемуарах акцёр пісаў: «У «Вялікім перапынку» аб’ядналі чатыры пакаленні акцёраў: ад папулярных народных да тых, хто толькі што скончыў тэатральную школу. Мне ўвесь час даводзілася апраўдваць фантасмагарычныя сітуацыі і нязручны тэкст. Але фільм меў вялікі поспех. У гэтым, лічу, і ёсць моц талентаў тых часоў. Любая лухта ў іх выкананні выглядала міла і чароўна, а галоўнае — шчыра».
Мароз Чырвоны Нос
На наступны дзень, 31 снежня, тэлеканал працягне культурны марафон. У 18:50 аўдыторыі прапануюць рэжысёрскі дэбют акцёра Уладзіміра Машкова — авантурную камедыю «Сірата казанская». У цэнтры сюжэта — сельская настаўніца Насця, якая аднойчы размясціла ў газеце аб’яву пра пошук бацькі. І вось у навагоднюю ноч у госці да Насці прыехалі… адразу тры прэтэндэнты на гэтую ролю! Тых «бацькоў» сыгралі Валянцін Гафт, Алег Табакоў і Леў Дураў.
Ну а вечарам напярэдадні Новага года будзе карысна паглядзець казку «Марозка» рэжысёра Аляксандра Роу. На працягу многіх гадоў у Чэхіі і Славакіі гэты фільм заўсёды паказваюць па тэлебачанні на Новы год. Дарэчы, пасля выхаду стужкі Аляксандр Хвыля стаў галоўным Дзедам Марозам СССР і ўдзельнічаў у гэтай якасці на ёлках у Крамлі. А вось Іна Чурыкава пасля прэм’еры… заплакала. Знакамітая артыстка ўспамінала:
— У нас на курсе была вельмі таленавітая актрыса Тамара Носава, якую Роу першапачаткова хацеў узяць на ролю Марфы. Але аднойчы ў калідорах інстытута мы сустрэлі памочніка дырэктара, і яна параіла мяне рэжысёру. Нам з Тамарай падчас рэпетыцый даводзілася бясконца грызці арэхі. І я так хацела здымацца, што нават зубоў не шкадавала! Таму, напэўна, Роу мяне і заўважыў. Калі ўпершыню ўбачыла сябе на экране, заплакала. Падумала: «Мамачкі, якая я страшная!»
Інфармацыя падрыхтавана па матэрыялах СБ «Беларусь сегодня».