17 верасня 2021 года ў краме РУП “Белсаюздрук” “Глобус” адбылася прэзентацыя праекта, прысвечанага Году і Дню народнага адзінства ў Рэспубліцы Беларусь – «Адзінства народа – вялікі здабытак!».

У рамках праекта былі зроблены падборкі публікацый з беларускіх выданняў 20-30-х гадоў (“Сялянская ніва”, “Жыццё беларуса”, “Беларускі звон”, “Маланка” і інш.), якія адлюстроўваюць гістарычныя падзеі па аб’яднанні беларускіх зямель, цяжкія выпрабаванні беларускага народа ў той час.

Гістарычныя артэфакты былі прэзентаваны падчас святкавання Дня беларускага пісьменства ў г.Капылі на пляцоўцы “17 верасня – Дзень народнага адзінства” і выклікалі вялікую зацікаўленнасць наведвальнікаў.

Апрацаваныя матэрыялы былі распаўсюджаны для шырокага выкарыстання падчас святкавання Дня народнага адзінства ў сістэме Міністэрства адукацыі, рэспубліканскіх і рэгіянальных сродках масавай інфармацыі.

Далей у рамках праекта Міністэрствам інфармацыі пры дапамозе РУП “Белсаюздрук” выданні былі растыражаваны і ў будуць прадстаўлены для шырокага кола праз сетку павільёнаў і кіёскаў па ўсёй краіне. Адначасова на светавых панэлях павільёнаў размешчаны калажы вышэйназваных выданняў.

Неад’емнай часткай праекта з’яўляецца кніга “17 верасня. Дзень народнага адзінства”, выдадзеная выдавецкім домам “Звязда”, аўтара Уладзіміра Ліхадзедава, на матэрыялах з калекцыі якога былі зроблены падборкі тагачасных выданняў.

Да свята далучыўся факультэт міжнародных бізнес-камунікацый БДЭУ.

Студэнты ФМБК пры падтрымцы  дэканата факультэта Юліі Аляксандраўны Шаўрук, яе намесніка Руслана Ягоравіча Ганчарова і загадчыцы кафедры беларускай і рускай моў Вольгі Мікалаеўны Губскай, падрыхтавалі для гасцей цікавую праграму, прысвечаную Дню народнага адзінства. Там было ўсё: экскурс у гісторыю падзелу Беларусі ў 1921 годзе, вершы, віктарыны і песні. Акрамя таго, гледачам была прапанавана экспазіцыя друкаваных выданняў Беларусі 1920-1930-х гадоў, якая праводзілася ў рамках праекта Міністэрства інфармацыі Рэспублікі Беларусь “Адзінства народу - вялікі здабытак”. Арыгінальныя тэксты, напісаныя тарашкевіцай, далі магчымасць удзельнікам мерапрыемства адчуць каларыт той эпохі.