24–25 кастрычніка 2019 года на факультэце журналістыкі БДУ адбылася Міжнародная навукова-практычная канферэнцыя «Выдавецкая справа ў Рэспубліцы Беларусь: гісторыя, сучасны стан і перспектывы», арганізаваная па ініцыятыве Міністэрства інфармацыі Рэспублікі Беларусь кафедрай медыялінгвістыкі і рэдагавання.

Уступным словам канферэнцыю адкрыла дэкан факультэта журналістыкі БДУ В.М.Самусевіч, кандыдат філалагічных навук, дацэнт. З прывітальным словам выступіў Міністр інфармацыі Рэспублікі Беларусь А.М.Карлюкевіч, які адзначыў надзённасць тэмы навуковага форуму і пажадаў плёну ў рабоце.

Пасля пленарнага пасяджэння праведзены круглы стол экспертаў, мадэратарамі якога выступілі В.І.Іўчанкаў, загадчык кафедры медыялінгвістыкі і рэдагавання факультэта журналістыкі БДУ, доктар філалагічных навук, прафесар, і У.У.Андрыевіч, начальнік упраўлення выдавецкай і паліграфічнай дзейнасці Міністэрства інфармацыі Рэспублікі Беларусь.

У якасці экспертаў на круглы стол былі запрошаны намеснік Міністра інфармацыі Рэспублікі Беларусь І. І. Бузоўскі, дырэктар выдавецтва «Мастацкая літаратура” А. М. Бадак, дырэктар выдавецтва «Беларуская Энцыклапедыя імя Петруся Броўкі» В. У. Ваніна, дырэктар выдавецтва «Адукацыя і выхаванне» М.А.Супрановіч, начальнік упраўлення рэдакцыйна-выдавецкай работы БДУ Н.М.Герасімовіч, дацэнт кафедры журналістыкі Палтаўскага нацыянальнага педагагічнага ўніверсітэта імя У.Г.Караленкі, кандыдат навук па сацыяльных камунікацыях Г.А.Кудрашоў.

Былі абмеркаваны тры групы пытанняў:

1. Кніга ў сучасным свеце. Інтэрактыўная кніга з выхадам у альтэрнатыўную рэальнасць;

2. Сучаснае выдавецтва: пераемнасць традыцый і выклікі часу. Будучае прарастае з сённяшняга;

3. Эфектыўныя маркетынгавыя стратэгіі.

У час дыскусіі адзначалася, што новыя інфармацыйныя тэхналогіі змяняюць падыходы да канструявання і выдання кнігі, якая становіцца больш разнастайнай у параўнанні з ранейшымі часамі. Змены закранаюць усе аспекты дзейнасці кнігавыдавецкага прадпрыемства, аднак галоўнае застаецца нязменным – гэта аўтар, яго талент і ўменне данесці сваю думку да чытацкай аўдыторыі, а таксама высокая сацыяльная місія кнігі ў сучасным глабалізаваным свеце. Трансфармацыя выдавецкіх прадпрыемстваў дае магчымасць больш гібка падыходзіць да стварэння эфектыўных кніжных праектаў і выходзіць з імі на міжнародны ўзровень. Усе ўдзельнікі сышліся на тым, што друкаваная кніга будзе змяняцца, але не мае права знікнуць ні з паліц кнігарняў, ні са школьнай і ўніверсітэцкай адукацыі.

У другой палове дня 24 кастрычніка прайшлі панэльныя дыскусіі, на якіх асвятляліся пытанні шматграннасці гісторыі і сучаснасці ў выдавецкай дзейнасці, падрыхтоўкі шматпрофільнага спецыяліста для выдавецкай галіны, узаемаўплыву выдавецкай дзейнасці і журналістыкі. У пасяджэннях панэльных дыскусій бралі ўдзел больш за 40 навукоўцаў і спецыялістаў-практыкаў як з Беларусі, так і з іншых краін.

Падчас работы канферэнцыі ў медыятэцы імя М.Я.Цікоцкага факультэта журналістыкі БДУ ладзілася выстава «Лепшыя з лепшых: кнігі – пераможцы Нацыянальнага конкурсу «Мастацтва кнігі», праведзена інтэрактыўная экскурсія «Гісторыя выдавецкай справы: з рэдкага фонду Фундаментальнай бібліятэкі БДУ», арганізавана творчая сустрэча з У.С.Ліпскім, галоўным рэдактарам часопіса «Вясёлка», пісьменнікам, заслужаным работнікам культуры Рэспублікі Беларусь, і акадэмічная студыя Г.А.Кудрашова «Дыпламатыя кнігі: “Энеіда” Катлярэўскага ў перакладзе Аркадзя Куляшова» і іншыя мерапрыемствы.

Пачэсны госць форуму дацэнт кафедры журналістыкі Палтаўскага нацыянальнага педагагічнага ўніверсітэта імя У.Г.Караленкі, кандыдат навук па сацыяльных камунікацыях Глеб Кудрашоў адзначыў высокі ўзровень  канферэнцыі, падкрэсліўшы надзвычайную патрэбу ў такім абмеркаванні і ў распаўсюджванні вельмі ўдалага фармату яе правядзення. 

Украінскі калега вызначыў тры часткі – экспертную, у якой прынялі ўдзел не толькі вучоныя і практыкі, але і кіраўнікі Міністэрства інфармацыі Рэспублікі Беларусь. Гэта надало дыскусіі асаблівы статус, прымусіла задумацца над праблемамі дзяржаўнага маштабу. 

Другая частка праходзіла ў фармаце панэльных дыскусій, што запатрабавала ад прысутных асаблівай ўвагі да маркетынгу выдавецкай справы, вылучэння асаблівых падыходаў у ацэнцы тэхналогій кнігавыдання, ажыццяўленні маніторынгу рынкаў, укараненні экалагічна бяспечных матэрыялаў, энерга- і рэсурсазберагальных тэхналогій у паліграфічнай прамысловасці. 

Трэцяя частка, на думку эксперта, стала асабліва запатрабаванай і ўражлівай, бо мела творчы характар. 

Сустрэча з Уладзімірам Ліпскім прыадкрыла маладым акенца ў сапраўдную майстэрню, духоўны свет пісьменніка. Інтэрактыўная экскурсія ў гісторыю выдавецкай справы, віртуальныя прэзентацыі, акадэмічныя студыі,  творчыя майстэрні, захапляльныя паведамленні ад гасцей далі свой плён, сведчанне чаму – распачаты студэнтамі дыялог на інтэрнэт-пляцоўках, у аўдыторыях і на практычных занятках.

Глеб Кудрашоў падкрэсліў таксама высокі мастацка-паліграфічны ўзровень кніг беларускіх выдавецтваў, якія заўсёды заўважна выдзяляюцца на міжнародных кніжных выстаўках і з’яўляюцца ўзорам кнігаведавецкай справы.