Public talk з Андрэем Янушкевічам і Валерыем Славуком у «Светачы»
21 красавіка 2020 года ў кнігарні «Дом кнігі «Светач» (г.Мінск, пр-т Пераможцаў, 11) адбыўся public talk з дырэктарам выдавецтва «Янушкевіч» Андрэем Янушкевічам і мастаком Валерыем Славуком.
Гаворка ішла пра кнігу «Вядзьмар, які рабіўся ваўком», што нядаўна выйшла ў выдавецтве «Янушкевіч», пра яе атмасферныя казкі і непаўторныя ілюстрацыі.
Да размовы далучыўся ўкладальнік кнігі — Антон Францішак Брыль, унук знакамітага беларускага пісьменніка Янкі Брыля.
Дарэчы, кніга ўжо даступная для перадзамовы на magazin.belkniga.by, а сам старт продажаў адбудзецца 22 красавіка адначасова ва ўсіх кнігарнях сеткі «Белкніга». Толькі ў дзень старта продажаў усіх аматараў цмокаў, ваўкалакаў ды рознага кшалту нячысцікаў чакае зніжка 15% на кнігу.
«Вядзьмар, які рабіўся ваўком» — гэта 30 беларускіх чарадзейных казак і паданняў з розных куткоў Беларусі, запісаныя ў канцы XIX- пачатку XX стагоддзя, а цяпер наноў адабраныя і апрацаваныя. Некаторыя з гэтых гісторый усім вядомыя, а іншыя, наадварот, рэдка траплялі ў выданні для шырокага чытача.
Відэазапіс можна будзе знайсці на Youtube-канале «Белкнігі».
Інфармацыя падрыхтавана па матэрыялах ААТ «Белкніга».